ସମ୍ବଲପୁର: ସମ୍ବଲପୁର ଜିଲ୍ଲାକୁ ରାଜ୍ୟର ଏକ ପ୍ରମୁଖ ମସଲା ଉତ୍ପାଦନ, ପ୍ରକ୍ରିୟାକରଣ ଓ ବାଣିଜ୍ୟିକ କେନ୍ଦ୍ର ଭାବେ ବିକଶିତ କରିବା ଲକ୍ଷ୍ୟରେ ପାଞ୍ଚ ବର୍ଷିଆ ମସଲା ବିକାଶ ଯୋଜନା ପ୍ରସ୍ତୁତ କରାଯାଇଛି। ଏହି ଯୋଜନା ମାଧ୍ୟମରେ ମସଲା ଚାଷର ସମ୍ପ୍ରସାରଣ, ଚାଷୀଙ୍କୁ ପ୍ରଶିକ୍ଷଣ ଏବଂ ଉତ୍ପାଦିତ ମସଲାର ବଜାର ସଂଯୋଗକୁ ସୁଦୃଢ଼ କରିବା ଉପରେ ଗୁରୁତ୍ୱ ଦିଆଯିବ।
ଜିଲ୍ଲାପାଳ ସିଦ୍ଧେଶ୍ୱର ବଳିରାମ ବୋନ୍ଦରଙ୍କ ଅଧ୍ୟକ୍ଷତାରେ ଏନେଇ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ହୋଇଥିଲା। ବୈଠକରେ କୁଚିଣ୍ଡା ଉପଜିଲ୍ଲାପାଳ ସି. ସରବଣନ୍, ଭାରତୀୟ ମସଲା ବୋର୍ଡର ବରିଷ୍ଠ ଅଧିକାରୀ ଏବଂ ଜିଲ୍ଲାର ବିଭିନ୍ନ ବିଭାଗର ଅଧିକାରୀମାନେ ଯୋଗଦେଇଥିଲେ।
ଯୋଜନାର ମୁଖ୍ୟ ଦିଗ:
୧. ପ୍ରାରମ୍ଭିକ ପର୍ଯ୍ୟାୟରେ କୁଚିଣ୍ଡା ଉପଖଣ୍ଡର ଚାରିଟି ପଞ୍ଚାୟତରେ ଯୋଜନା ଆରମ୍ଭ କରାଯିବ।
୨. ମାଟିର ଗୁଣବତ୍ତା, ଜଳବାୟୁ ଓ ଜଳସେଚନ ସୁବିଧା ଅନୁଧ୍ୟାନ କରି ହଳଦୀ, ଅଦା, ଲଙ୍କା ଓ ଧନିଆ ଚାଷ ପାଇଁ ଉପଯୁକ୍ତ ଅଞ୍ଚଳ ଚିହ୍ନଟ କରାଯିବ।
୩. ପ୍ରତ୍ୟେକ ବ୍ଲକ୍ରେ ମସଲା କ୍ଲଷ୍ଟର ଗଠନ କରି ଚାଷୀ, କୃଷକ ଉତ୍ପାଦକ ସଂଗଠନ ଓ ସ୍ୱୟଂସହାୟକ ଗୋଷ୍ଠୀଙ୍କୁ ଯୋଡ଼ାଯିବ।
୪. ମସଲା ବୋର୍ଡ ଓ ଉଦ୍ୟାନ କୃଷି ବିଭାଗ ପକ୍ଷରୁ ଚାଷୀଙ୍କୁ ବୈଜ୍ଞାନିକ ଚାଷ ପଦ୍ଧତି ଓ ଉନ୍ନତ ବିହନ ବ୍ୟବହାର ସମ୍ପର୍କରେ ପ୍ରଶିକ୍ଷଣ ଦିଆଯିବ।
୫. ଅମଳ ପରେ ମସଲା ଶୁଖାଇବା, ଗ୍ରେଡିଂ, ସଂରକ୍ଷଣ ଓ ପ୍ରକ୍ରିୟାକରଣ ସୁବିଧା ବିକଶିତ କରିବା ଯୋଜନା ରହିଛି।
ଏଥିସହ ‘ସମ୍ବଲପୁର ସ୍ପାଇସେସ୍’ ନାମରେ ଏକ ସ୍ୱତନ୍ତ୍ର ବ୍ରାଣ୍ଡ ଗଠନ କରିବାର ଲକ୍ଷ୍ୟ ରହିଛି। ଯୋଜନାର କାର୍ଯ୍ୟାନ୍ୱୟନ ଦ୍ୱାରା ମସଲା ଚାଷର ସମ୍ପ୍ରସାରଣ, ଉତ୍ପାଦର ବଜାର ସୁଯୋଗ ଏବଂ ଜିଲ୍ଲାର କୃଷିଭିତ୍ତିକ ଅର୍ଥନୀତିକୁ ଗତି ମିଳିବା ଆଶା କରାଯାଉଛି।