ଗୁରୁ କେଳୁଚରଣ ଓଡ଼ିଶୀ ଗବେଷଣା କେନ୍ଦ୍ରରେ ଗାନ୍ଧୀ ଜୟନ୍ତୀ ପାଳିତ: ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଏବଂ ବିଶିଷ୍ଟ ବ୍ୟକ୍ତିଙ୍କୁ ସମ୍ମାନ ସହ ମାନପତ୍ର ପ୍ରଦାନ
ଭୁବନେଶ୍ୱର: ସମଗ୍ର ଦେଶ ଆଜି ଜାତିର ପିତା ମହାତ୍ମା ଗାନ୍ଧୀଙ୍କ ଜୟନ୍ତୀକୁ ବିପୁଳ ଉତ୍ସାହ ଓ ଶ୍ରଦ୍ଧାର ସହ ପାଳନ କରୁଥିବା ବେଳେ, ଭୁବନେଶ୍ୱର ସ୍ଥିତ ଗୁରୁ କେଳୁଚରଣ ଓଡ଼ିଶୀ ଗବେଷଣା କେନ୍ଦ୍ରଠାରେ 'ରୂପାୟନ ଟ୍ରଷ୍ଟ' ଏବଂ 'ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ' ପକ୍ଷରୁ ମିଳିତ ଭାବେ ଏହି ପବିତ୍ର ଦିବସକୁ ବେଶ୍ ଗାମ୍ଭୀର୍ଯ୍ୟ ଓ ଭକ୍ତିପୂତ ପରିବେଶ ମଧ୍ୟରେ ପାଳନ କରାଯାଇଛି।
ଏହି ଅବସରରେ ରୂପାୟନର ସଭାପତି ଅନିଲ କୁମାର ମହାନ୍ତିଙ୍କ ସହ କର୍ମକର୍ତ୍ତାମାନେ ସକାଳୁ ସକାଳୁ ପହଞ୍ଚି ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ସମବେତ ରାମଧୂନ ଗାନ କରି ବାପୁଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। ଅନୁଷ୍ଠିତ ଏହି ମହତ୍ କାର୍ଯ୍ୟକ୍ରମରେ ଶ୍ରୀମତୀ ରାୟ ଗାନ୍ଧୀଜୀଙ୍କ ଅହିଂସା, ସତ୍ୟ ଓ ମାନବ ସେବାର ଆଦର୍ଶ ଉପରେ ଆଲୋକପାତ କରିଥିଲେ। ସେ କହିଥିଲେ ଯେ, ବାପୁଙ୍କ ଦର୍ଶନ ଆଜିର ସମାଜ ପାଇଁ ଅତ୍ୟନ୍ତ ପ୍ରାସଙ୍ଗିକ। ରୂପାୟନ ଟ୍ରଷ୍ଟ ଏବଂ ଓଡ଼ିଆ ଭାଷା ଓ ସାହିତ୍ୟ ସଦାସର୍ବଦା ଗରିବ ଓ ଅସହାୟଙ୍କ ସେବା ସହ କଳା, ସଂସ୍କୃତି ଓ ସାହିତ୍ୟର ଉନ୍ନତି ପାଇଁ କାର୍ଯ୍ୟ କରିଆସୁଛି ଏବଂ ଆଗକୁ ମଧ୍ୟ ଗାନ୍ଧୀଜୀଙ୍କ ସେବା ମନୋଭାବକୁ ପାଥେୟ କରି ଏହି ଧାରା ଜାରି ରହିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ।
ସନ୍ଧ୍ୟା ୫ଟାରେ ଆରମ୍ଭ ହୋଇଥିଲା 'ମହାତ୍ମା ଗାନ୍ଧୀ ସଦଭାବନା ସଭା' କାର୍ଯ୍ୟକ୍ରମ। ଓଡ଼ିଶାର କଳା ଓ ସଂସ୍କୃତି ଏବଂ ଚଳଚ୍ଚିତ୍ର ଜଗତର ଜଣାଶୁଣା ନିର୍ଦ୍ଦେଶକ ତଥା ପଦ୍ମଶ୍ରୀ ଶିଶିର ମିଶ୍ର, ଲବ୍ଧପ୍ରତିଷ୍ଠିତ ସାହିତ୍ୟିକ ଶ୍ରୀଯୁକ୍ତ ଦାଶ ବେନହୁର, ପ୍ରଫେସର ସନ୍ତୋଷ ଆଚାର୍ଯ୍ୟ, ଯୁଗ୍ମ ନିର୍ଦ୍ଦେଶକ (Joint Director) ଅଜିତ ପଟ୍ଟନାୟକ ଏବଂ 'ନ୍ୟୁ ମିଶନ ଓଡ଼ିଶା'ର ମୁଖ୍ୟ ଭରତେନ୍ଦୁ ଦାସ ପ୍ରମୁଖ ଯୋଗ ଦେଇ ସୁଚିନ୍ତିତ ମତ ରଖିଥିଲେ।
ପରେ ପରେ ମହାତ୍ମା ଗାନ୍ଧୀ ସଦଭାବନା ସମ୍ମାନ ଓ ମାନପତ୍ର ପ୍ରଦାନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ବିଶିଷ୍ଟ ବ୍ୟକ୍ତିମାନଙ୍କୁ ସମ୍ମାନିତ କରାଯାଇଥିଲା। ସମାଜସେବା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଶ୍ରୀଯୁକ୍ତ ଅଚ୍ୟୁତ ଦାସ, ସାହିତ୍ୟ ସାଧନା ପାଇଁ ଶ୍ରୀଯୁକ୍ତ ସିତେଶ ତ୍ରିପାଠୀ, ସାମ୍ବାଦିକତା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଶ୍ରୀଯୁକ୍ତ ଅନୁପମ ପ୍ରହରାଜ, ଶିକ୍ଷା ପାଇଁ ଶ୍ରୀଯୁକ୍ତ ତାପସ କୁମାର ମହାନ୍ତି, ଚଳଚ୍ଚିତ୍ର ନିର୍ଦ୍ଦେଶନା ପାଇଁ ଶ୍ରୀଯୁକ୍ତ ଦିଲୀପ ପଣ୍ଡା ଏବଂ କଳା ଓ ସଂସ୍କୃତି ପାଇଁ ଶ୍ରୀମତୀ ଗାୟତ୍ରୀ ମିଶ୍ରଙ୍କୁ ସମ୍ମାନିତ କରାଯାଇଥିଲା।
ଏହି ଅବସରରେ 'କନ୍ୟା ଅନମୋଲ'ର ପ୍ରତିଷ୍ଠାତା ସରୋଜ ଦାସଙ୍କୁ 'ମହାତ୍ମା ଗାନ୍ଧୀ ସେବା ସମ୍ମାନ'ରେ ସମ୍ମାନିତ କରାଯାଇଛି। ସମାଜସେବା ଏବଂ କନ୍ୟା ସୁରକ୍ଷା କ୍ଷେତ୍ରରେ ତାଙ୍କର ଉଲ୍ଲେଖନୀୟ ଅବଦାନ ପାଇଁ ଏହି ବୃହତ୍ ସମ୍ମାନ ଉତ୍ସବରେ ତାଙ୍କୁ ଏହି ପୁରସ୍କାର ପ୍ରଦାନ କରାଯାଇଥିଲା।
ଏହି ଗୌରବମୟ ସମାରୋହରେ ବହୁ ପ୍ରମୁଖ ସମାଜସେବୀ ଓ ମାନ୍ୟଗଣ୍ୟ ବ୍ୟକ୍ତି ଯୋଗଦେଇଥିଲେ। ଅନ୍ୟମାନଙ୍କ ମଧ୍ୟରେ ସମାଜସେବୀ ସଂଜୟ ଭଞ୍ଜ, ଲଲିତା ମଞ୍ଜରୀ ବେହେରା, ତାପସ ସାହୁ, ଆଶୁତୋଷ ଦାଶ, ସୃଷ୍ଟି ଦୀପା, ଜ୍ୟୋତ୍ସ୍ନା ମୁର୍ମୁ, ବିଶ୍ୱ ଭୂଷଣ ରଥ, ଦିଲ୍ଲୀପ ସେଠୀ, ଗୌରୀ ଶଙ୍କର ମିଶ୍ର, ତୃପ୍ତି ମହାନ୍ତି, ବେବିରାଣୀ ଦାସ, ନମସ୍ୟା ମିଶ୍ର, ବନ୍ଦନା ରାୟ, ସଂଯୁକ୍ତା ସେଠୀ, ଜିତେନ୍ଦ୍ର ନାୟକ, ଅନିଲ ମହାନ୍ତି, ଗଦାଧର ପାତ୍ର, ଗୌତମୀ ଦାସ, ମନୀଷା ଲେଙ୍କା, ସ୍ନେହଲତା ରାୟ, ଭାରତ ଦାସ ଅଧିକାରୀ ଆଦି 'ରୂପାୟନ' ପରିବାରର ସଦସ୍ୟମାନେ ଉପସ୍ଥିତ ରହି କାର୍ଯ୍ୟକ୍ରମକୁ ସାଫଲ୍ୟମଣ୍ଡିତ କରିଥିଲେ।
ଏହି ସ୍ମରଣୀୟ ଅବସରରେ ଉଭୟ ଅନୁଷ୍ଠାନର ବହୁ ମାନ୍ୟଗଣ୍ୟ ସଦସ୍ୟ, ସାହିତ୍ୟିକ ଓ କର୍ମକର୍ତ୍ତା ଉପସ୍ଥିତ ରହି ଜାତିର ପିତାଙ୍କ ସ୍ମୃତିଚାରଣ କରିବା ସହ ସମାଜ ମଙ୍ଗଳ ଏବଂ ସାହିତ୍ୟ ସେବାରେ ନିଜକୁ ନିୟୋଜିତ କରିବା ପାଇଁ ସଂକଳ୍ପ ନେଇଥିଲେ।

