ନବମ ଦିନରେ ସମବାୟ ଚିନିଶିଳ୍ପର ଶ୍ରମିକ ଆନ୍ଦୋଳନ: କର୍ତ୍ତୃପକ୍ଷଙ୍କ ନିରବତାକୁ ନେଇ ବଢୁଛି ଅସନ୍ତୋଷ, ଆଗାମୀ ଦିନରେ ଆନ୍ଦୋଳନ ତୀବ୍ର ହେବା ଚେତାବନୀ
ରିପୋର୍ଟ: କବିରାଜ ପାତ୍ର ସ୍ଵତନ୍ତ୍ର ପ୍ରତିନିଧି।
ଆସିକା: ଏସିଆ ମହାଦେଶର ପ୍ରଥମ ତଥା ସବୁଠାରୁ ପୁରାତନ ଆସିକା ସମବାୟ ଚିନିଶିଳ୍ପ ପରିସରରେ ଶ୍ରମିକମାନଙ୍କ ଦ୍ୱାରା ଜାରି ରହିଥିବା ଅନିର୍ଦ୍ଦିଷ୍ଟକାଳୀନ ଧାରଣା ଆଜି ନବମ ଦିନରେ ପହଞ୍ଚିଛି। ତ୍ରିପାକ୍ଷିକ ଚୁକ୍ତି ଏବଂ କେ-ଫର୍ମରେ ଦିଆଯାଇଥିବା ଲିଖିତ ପ୍ରତିଶ୍ରୁତିକୁ ଦୀର୍ଘ ଦିନ ହେବ ପାଳନ କରାଯାଉ ନଥିବାରୁ, ଏହାର ପ୍ରତିବାଦରେ ଶତାଧିକ ଶ୍ରମିକ କାରଖାନାର ମୁଖ୍ୟ ଗେଟ୍ ସମ୍ମୁଖରେ ଆନ୍ଦୋଳନ ଜାରି ରଖିଛନ୍ତି। ତେବେ ଅତ୍ୟନ୍ତ ଦୁଃଖର ବିଷୟ ଯେ, ଆନ୍ଦୋଳନ ଦୀର୍ଘ ୯ ଦିନରେ ପହଞ୍ଚିଥିଲେ ମଧ୍ୟ ଚିନିଶିଳ୍ପ କର୍ତ୍ତୃପକ୍ଷ ଶ୍ରମିକମାନଙ୍କ ସହ କୌଣସି ପ୍ରକାର ଆଲୋଚନା କରିନାହାନ୍ତି କିମ୍ବା ସମସ୍ୟାର ସମାଧାନ ପାଇଁ ତତ୍ପରତା ପ୍ରକାଶ କରିନାହାନ୍ତି। କର୍ତ୍ତୃପକ୍ଷଙ୍କ ଏଭଳି ଦାୟିତ୍ୱହୀନ ଓ ନିରବ ମନୋଭାବକୁ ନେଇ ଆନ୍ଦୋଳନକାରୀ ଶ୍ରମିକଙ୍କ ମଧ୍ୟରେ ତୀବ୍ର ଅସନ୍ତୋଷ ଓ ଆକ୍ରୋଶ ପ୍ରକାଶ ପାଇଛି।
ଶ୍ରମିକ ସଂଘର ସୂଚନା ମୁତାବକ, ଗତକାଲି ପବିତ୍ର ବିଶ୍ୱକର୍ମା ପୂଜା ଅବସରରେ ଗୋଟିଏ ଦିନ ପାଇଁ ଧାରଣାକୁ ସ୍ଥଗିତ ରଖାଯାଇଥିବା ବେଳେ ଆଜି ପରବର୍ତ୍ତୀ ଦିନରୁ ପୁଣି ଥରେ ପୂର୍ଣ୍ଣ ଆଗ୍ରହ ଓ ଦୃଢ଼ତାର ସହ ଆନ୍ଦୋଳନ ଆରମ୍ଭ ହୋଇଛି। ସଂଘର ପ୍ରମୁଖ ଦାବିଗୁଡ଼ିକ ମଧ୍ୟରେ ଦୀର୍ଘ ଦିନରୁ କାର୍ଯ୍ୟରତ ଏନ.ଏମ.ଆର ଶ୍ରମିକମାନଙ୍କୁ ସ୍ଥାୟୀ ନିଯୁକ୍ତି ଦେବା, ଗତ ୪ ବର୍ଷର ବକେୟା ଥିବା ପ୍ରୋତ୍ସାହନ (ବୋନସ୍) ରାଶି ତୁରନ୍ତ ପ୍ରଦାନ କରିବା ଏବଂ ଯୋଗ୍ୟତା ଭିତ୍ତିରେ ଶ୍ରମିକମାନଙ୍କୁ ପଦୋନ୍ନତି ଦେବା ଆଦି ଅନ୍ତର୍ଭୁକ୍ତ ରହିଛି। ପୂର୍ବରୁ ଏହି ସବୁ ପ୍ରସଙ୍ଗରେ ତ୍ରିପାକ୍ଷିକ ବୈଠକରେ ଲିଖିତ ପ୍ରତିଶ୍ରୁତି ଦିଆଯାଇଥିଲେ ମଧ୍ୟ ଏପର୍ଯ୍ୟନ୍ତ ତାହାର ସମ୍ପୂର୍ଣ୍ଣ ପାଳନ କରାଯାଇ ନାହିଁ ବୋଲି ଧାରଣା ସ୍ଥଳରେ ଶ୍ରମିକମାନେ ଅଭିଯୋଗ କରିଛନ୍ତି।
ଧାରଣା ସ୍ଥଳରୁ ଶ୍ରମିକ ସଂଘର କର୍ମକର୍ତ୍ତାମାନେ ସିଧାସଳଖ ଚେତାବନୀ ଦେଇଛନ୍ତି ଯେ, ଶ୍ରମିକମାନଙ୍କ ନ୍ୟାର୍ଯ୍ୟ ଦାବିକୁ ଆଉ ବେଶି ଦିନ ଚାପି ରଖାଯାଇ ପାରିବ ନାହିଁ। ଯଦି କର୍ତ୍ତୃପକ୍ଷ ତୁରନ୍ତ ଆଲୋଚନା ଟେବୁଲକୁ ନ ଆସନ୍ତି ଏବଂ ଦାବି ପୂରଣ ଦିଗରେ କୌଣସି ସକରାତ୍ମକ ପଦକ୍ଷେପ ଗ୍ରହଣ ନ କରନ୍ତି, ତେବେ ଆଗାମୀ ଦିନରେ ଏହି ଆନ୍ଦୋଳନ ଆହୁରି ଉଗ୍ର ରୂପ ଧାରଣ କରିବ। ଶ୍ରମିକମାନେ କାରଖାନାର ସମସ୍ତ କାର୍ଯ୍ୟ ବନ୍ଦ କରି ସମ୍ପୂର୍ଣ୍ଣ ଅଚଳାବସ୍ଥା ସୃଷ୍ଟି କରିବାକୁ ବାଧ୍ୟ ହେବେ ବୋଲି କହିଛନ୍ତି। ବର୍ତ୍ତମାନର ଏହି ଜଟିଳ ପରିସ୍ଥିତିରେ ଆସିକା ଚିନିଶିଳ୍ପ କର୍ତ୍ତୃପକ୍ଷ ଏବଂ ପ୍ରଶାସନ କି ଆଭିମୁଖ୍ୟ ଗ୍ରହଣ କରୁଛନ୍ତି, ତାହା ଉପରେ ଏବେ ସମସ୍ତଙ୍କ ନଜର ରହିଛି।